Månadens bilete er ein blyantteikning av Ulvik i A2 storleik. Teikningen er ferdig innramma. Ta kontakt med meg dersom du ynskjer å kjøpa.

Månadens bilete er av blåmeisar, og teknikken er akryl på treplate. Motivet har utgangspunkt i fleire foto tekne av Steinar Bergo. Ta kontakt med meg dersom du ynskjer å kjøpa.

Månadens bilete er ein pastellteikning med utsyn frå vegen opp til Håheim i Ulvik. Ta kontakt med meg dersom du ynskjer å kjøpa.

Månadens bilete har motiv av Ulvikfjorden sett frå Oppheim. Teknikken er pastell på papir, i a3-format. Biletet blir levert ferdig innramma. Ta kontakt med meg dersom du ynskjer å kjøpa.

No har eg fylt på med nye og "gamle" motiv av innramma kort på Handelslaget i Ulvik. Det er fleire eksemplar av kvart motiv, og dei kostar 150 kr stk. Ei fin lita gåve eller suvenir å ta med seg!

Topp frå venstre: Mot Botn i Fyksesund, Utsikt frå Bruravik, Stavanes i Eidfjord.

Midten frå venstre: Mølstertunet, Ulvikfjorden (sommar), Ulvikfjorden (vinter).

Nedst frå venstre: Landskap, Sotenuten, Heimatt frå Rødekorshytta.

Månadens bilete for juli, har motiv av morelleblomar. Bakgrunnen i motivet er Ulvik. Teknikken er akryl på lerret. Biletet heng til sals på Måndagsmålarane sin sommarutstilling på Hotel Ullensvang, som står til og med 28.juli.

Van Gogh Alive på Hadeland Glassverk

I pinsehelga besøkte eg Hadeland Glassverk og såg utstillinga Van Gogh Alive. Måleria vart levande, som tittelen på utstillinga seier. Ved hjelp av prosjektorar, store lerret og vakker musikk, fekk ein kjensla av å gå inne i måleriet, heilt inn til minste penselstrøk og ut att til heile måleriet. Det vart kombinert med korte tekstar på lerretet om livet og karrieren til Van Gogh og sitat frå dei talrike breva han skreiv.

I periodar levde han svært isolert og kommuniserte gjennom brev. I heile sitt liv selde han berre eit måleri, då samtida ikkje aksepterte hans nyskapande måte å måla på. Måleria hans er svært uttrykksfulle, og viser mykje av hans eigne sinnsstemningar, frå dei ljose og harmoniske til dei meir mørke og plaga sidene.

Dette er ein flott og annleis utstilling, som eg vil tilrå på det varmaste! Utstillinga står til 18.august.

Månadens bilete for juni, har motiv av Paul Newman som Butch Cassidy. Teknikken er blyant og fargeblyant på papir. Ta kontakt med meg dersom du ynskjer å kjøpa.

Månadens bilete for mai, viser ein ung Clint Eastwood frå 1962. Teknikken er blyant og fargeblyant på papir. Teikninga kjem for sal i Uttrågata 19, ferdig innramma. Dinah Varberg Sabri og eg opnar utstillinga "Masker" på 19, med portrett som tema den 20. mai klokka 10.00. Utstillinga vil halda ope i to veker. Velkomne innom!

Det begynner å vårast og bli varmt i veret, og då passar det fint med eit bilete av Hardangerbrua og fjorden i solskin. Teikninga er til sals. Pastell på papir i A3-format.

Eg er i portrettmodus for tida, og månadens bilete for mars er eit enkelt portrett i kolstift av ei klasseveninne. Teikninga laga eg då eg gjekk på folkehøgskule på Nordfjordeid 2000/2001. Det viser at ein treng ikkje bruka mange detaljar for å få fram trekka hjå ein person.

Månadens bilete for februar viser magnoliablom med eit stilisert landskap i bakgrunnen. Dei fleste magnoliasortane blømer på berr kvist om våren. Teknikken er akryl på lerret. Ta direkte kontakt med meg dersom du ynskjer å kjøpa.

Det aller fyrste månadens bilete har endene ved gamle Tintrabrui på Voss som motiv. Teknikken er akryl på lerret. Dersom du er interessert i å kjøpa, så er dette måleriet utstilt i Kunstvandring Voss sine lokale i Uttrågata 19.